Passatempi casalinghi

Eh niente, me go messo a far una nova attività casalinga…

Go ciolto un vasetto svodo de vetro, anni fa dentro ghe iera una marmellata o forsi una crema contro i pei incarnidi, ma desso no ga importanza coss che iera dentro perché ve go de contar che :

• go ciolto sto vasetto,
• lo go ricoperto col das (che co iero picia lo ciamavo sempre dash e pena verso i 43 anni e mezzo go capido che sta plastilina no podeva gaver el stesso nome del detersivo che dopero per netar le mudande),
• sora sto das go messo un centrin fato a man nel 1924 dala zia de mia nona con sua sorela più mio zio volte due diviso 4, tira via el numero de persone che xe stade imbroiade da Vanna Marchi nel 1994, e somma i punti dela patente che te xe rimasti,
• go lassado sugar sto das col centrin del 1924 per tre giorni e tre notti più tre minuti e mezzo,
• volevo tirar via el centrin ma i tre giorni e tre noti – o forsi i tre minuti e mezzo? – ga sugado tutto talmente ben che el centrin no xe più vignudo via,

• quindi me ga tocado piturado el centrin del 1924, el das de l’altro ieri, el vasetto dela crema contro i pei, insomma go da’ a tuta sta roba una man de color color acrilico giallo,
• go lasado sugar el giallo el tempo de magnar una luganiga de cragno,
• go da’ una seconda man stavolta de color rosso,
• go lasado sugar el rosso el tempo de magnar un panin cola marmelata de susini del bosco de mia nona a Verteneglio,
• con tuto l’orgoglio del mondo son tornada a veder sto vasetto e con tutto el mio cuor penso che ….

XE VERAMENTE BRUTTO !!!

Alla prossima !