L’angolo delle fiabe “rivisitate”

Seconda puntata

Ucia pianzi disperada finchè, un dei tre sorzi che vivi con ela se stufa de sentirla, e ghe manda un whatsapp de aiuto a “Ucia la vecia” (la santola de Ucia)

“Ucia la vecia” legi el wapp, la cori de Mirela a comprar un vestiton per el ballo dela sua picia, la ciama el pronto intervento del fabbro per butar zo la porta dela soffitta, sembra tutto figon ma …

Ucia no ga come ‘ndar al ballo del Principe!!!

“Ucia la vecia” no la se perdi de animo, la se varda intorno, la vedi i tre sorzi e con una formuleta magica leta in t’un ciocolatin del supercoop, li trasforma in t’un grande monopattino volante che gnanca Giuseppe Conte riva a gaver compagno

Tuto bel e tuto bon ma…

Ucia devi esser casa a mezzanotte!!!

se no i tre sorzi vien fora del monopattino e i se lo magna

Fatta la xe, in t’ un secondo e mezzo Ucia xe al ballo nela villa de Ucio in Ponziana, finalmente la lo vedi in mezo al soggiorno, in tuta la sua belezza, el ga sti cavei fluenti, sti occi irriverenti, la bocca carnosa, ma soprattutto …

un per de mudande longhe color azzurro fosforescente….

A compagna vista Ucia proprio la no resisti e la casca per terra, rodolando zo per le scale come un sacco pien de luganighe de cragno ‘ndade de mal, ma tute ste rodolade la fa rivar dritta de Ucio che la ferma e la varda… Ucia se rianima, lo varda e con tuta la dolceza e bontà che la contraddistingui la ghe dizi

“Cocolo, ma proprio ste mudande azzurro fosforescenti te se dovevi metter??”

Ucio, un poco offeso ghe dizi:

“Ciò cocola, ma ti no te ieri quela che doveva perder la scarpetta de vetro, mi dovevo vignirte zercar per tuta Ponziana, te gavessi inveze trovado a Rojan sconta in t’una soffitta e per festeggiar se gavessimo sposado in t’un agriturismo de Sicjiole??”

Ucia, subito pronta, la ghe rispondi:

“Te podessi anche gaver ragion, ma che caligher te vol che fazzi scarpette de vetro numero 42 e mezzo???

E po’ coss te se perdi in ste sempiade, se gavemo trovado, ciolemosse, e a mezzanotte festeggiemo mi, ti e i tre sorzi che vegnerà fora del monopattino”

Nel sentir sto discorso Ucio taca rider con una legereza che no sentiva da quando che gaveva sei anni e giogava co le scinche, le sue ridade riva alle orecie de “The Crodighes” che le comincia a gaver mal de panza, a rodolarse su lore stesse fin che le se trasforma in pantigane grandi come la Zastava de Capodistria, e le sparissi in tei fraschi

Nel frattempo xe rivada mezzanotte, i tre sorzi vien fora del monopattino, i xe tropo contenti per Ucia, i la saluda e i va a zercar “The Crodighes” per morsigarghe el cul.

Ucio e Ucia i se sorridi felici, Ucio invita Ucia a restar in te la villa, la mula lo ringrazia con una dolcezza infinita, la se avvicina a lui e con voce suadente la ghe dizi:

“Ara che doman ‘ndemo de Fiducia in piaza Goldoni a cambiarte sti mudandoni”

“’Ndemo dove che te vol” ghe rispondi Ucio, za perso drio de ela,

“basta che stemo insieme, per sempre”

I se ga divorziado dopo due mesi e mezzo….

Alla prossima!