Eh niente… volessi un Omo
Xe che su E-Bay no se lo trova, mi go provado a zercar ma trovo solo che portarodoli per el gabineto, e a mi de portarodoli proprio no me interessa
Volevo butarghela a chi che me ga consegnado a casa l’altro ieri i panoloni per mia mama e lora lo go messo alla prova, domandandoghe con fare allusivo:
“La ‘scolti cocolo, xe vero che la me butassi via le scovazze che go in pergolo da dieze giorni?”
El iera sai attento, el me ga anche ‘scoltado in silenzio, e ala fine de sto lungo silenzio … el me ga domandado se iero sonada…
E lora ghe go risposto che no ga superado la prova e che nol xe minimamente degno de butarme le mie scovaze
Volevo quindi tentar con chi che me ga consegnado la spesa a casa, ma el gaverà avudo 17 anni e un quarto e no me pareva el caso de finir in canon
E mi go paura de finir in canon solo se vado butar le scovaze là dela ciesa de Rojan, che la xe a 252 metri da dove che vivo
Cossa fazo ‘lora?
La mia amica xe come mata per i siti de incontri, una volta go provado anche mi, ma dopo due frasi uno me ga domandado come che iero vestida e lora gavevo paura che in realtà iera mia mama che de ‘scondon la voleva saver se gavevo messo la maja de lana, e quindi go serado tuto.
No stemo parlar de quando uscivo con uno che me pareva che gaveva chissà che problemi esistenziali, problemi dei messaggi in codice dela sua vita ‘sconti in te le canzonete, del Universo che no se congiungi, inveze gaveva solo che la morosa ufficiale e mi iero niente altro che un ripiego per i giorni dispari.
Ma mi gavevo le fete de parsuto istrian sui oci e quindi …no capivo un klinz
Pensavo de dar una svolta ala mia vita ‘ndando sempre nela stessa farmacia, infati xe tute dotoresse…..e l’unico dotor che xe, el me parla sempre dela Rakija che ghe portava mia papà che xe morto nel 2015…
Discorso esaltante quasi quanto el suono dele campane el venerdì santo
Volevo provarghe col mio vicin de pianerottolo ma ghe go messo do anni per deciderme, co ghe go sonado la campanella xe vignuda a verzerme la moglie… e lora go capido che iero rivada giusto un fiatin tardi e per no far bruta figura ghe go domandado se la me imprestava un toco de carta da forno.
E desso?
Che fine farà el mio coredo de 42 sugamani, dieze peri de linzioi, 40 straze de piati e oto manopole per el gabineto?
Lo meterò su E-Bay
Alla prossima!
