Eh niente, i dizi che se uno ga un blog bisogna scriver ogni giorno…
Ma cossa scrivo??? Dove trovo argomenti??? De cossa parlo??????????
Me vardo intorno…e se fossi proprio questa la soluzion? Fatta.. go deciso!
Scelgo de scriver una storia con le prime tre robe che vedo adesso che me giro a destra:
- Tenda
- Ombra
- Stendibiancheria
La tenda Guenda, ogni giorno che passava la iera sempre più triste perché nissun la voleva più lavar, e quindi la diventava sempre più sporca e bruta che la fazeva quasi paura
La se proprio vergognava sta povera tenda Guenda, perché se vigniva trovarla qualchedun no ghe gavessi più dito “Guenda te diventi ogni giorno più bela” ma inveze ghe gavessi dito “Guenda mia, te son diventada diritura più bruta dei DPCM che fazeva Conte durante el lockdown”
Ma meno mal che la nostra Guenda no la iera sola, la gaveva un amico, el scagneto Bepo, con cui la se confidava spesso
El scagneto Bepo, pensa che te ripensa che te strapensa el ga un’idea, se ricorda che Guenda, se la iera triste che nissun la podeva lavar, ghe piazeva farse ‘carezar dale corde del stendibiancheria che però iera finido in cantina de zia Maria.
E lora ghe vol contattar zia Maria, e come se fa???
El scagneto Bepo, pensa che te ripensa che te strapensa el ga un’altra idea…la prima notte de luna piena el zerca de connetterse con zia Maria per contarghe tuto, e quindi per ‘iutar la sua amica Guenda (che, gavendo savudo del’idea del scagneto Bepo, la iera tuta imborezzada)
Zia Maria, che iera un poco striga, la prima notte de luna piena – per iutar i sogni e le rivelazioni notturne – la decidi de magnar capuzi garbi col kren che verzi tuti i 7 chakra e i te zonta anche due chakra in omaggio.
Dopo che la ga magnado la va dormir, ma tuta la note in sogno la perseguita l’ombra dela pignata dei capuzi garbi involtizada in t’una tenda giala conzada su un scagneto che ghe zigava come un mato che la devi ‘ndar in cantina”
Zia Maria ‘scolta tutto sto cine, la va in cantina, la se meti sul stendibiancheria, che, mejo del tappeto volante delle mille e una notte, la la porta diretamente dala tenda Guenda
Guenda, co la vedi el stendibiancheria la xe contenta proprio come quando i la lavava a novanta gradi tre volte la settimana, la ghe dà un bazeto al scagneto Bepo, la salta sul stendibiancheria insieme con zia Maria e tutti e tre i continua a svolar ogni note in giro per Trieste
I dizi che ogni notte de luna piena se li pol veder …
Alla prossima!
