L’angolo delle “Fiabe”…?

Ghe iera una volta una picia, che purtroppo la iera costretta a star in casa perché una striga cativa la gaveva butado su tuta la cità una polvere fata de crodiga ‘ndada de mal

Sta polvere al inizio sembrava che no la fazeva gnente, anzi, iera tuti alegri che ndava in giro un pochetin anche come zurli dizendo: “Sta polvere no te fa gnente, al limite te se ciapi un pochetin de febre come quela che se ciapa la armenta co la magna le luganighe de cragno ‘ndade de mal”

Solo che dopo un poco xe vignudo fora altro che febre! Iera tuti che cominciava star mal ma sai mal e le robe diventava brute, ma talmente brute come che xe brute le saline de Sicjole quando che no le ga gnaca più un fiatin de sal

E lora se zercava de capir el vero significato sconto drio sta polvere che ne gaveva butado indosso sta striga, sopratutto chi che iera sta striga.

Ma nissun capiva un klinz.

Bisognava star serai in casa perché se te ‘ndavi fora, te risciavi che sta polvere te ‘ndava dentro per tuti i pei e senza gnanca saver come, te podevi finir in canal de Ponterosso

Come se no bastassi, sta polvere fazeva indormenzar anche i botegheri e la striga, mentre che i botegheri dormiva, la se portava via pian pian tute le boteghe…

Ma all’inizio dela storia no se gaveva parlado de una picia?

E dove la xe ‘ndada finir sta picia?

Una sera sta insempiada de tanta fame che la gaveva, la se ga magnado una terina de luganighe de cragno ‘ndade de mal. Piena de paura de ciapar febre come la armenta, la va dormir, la se gira e la se missia fin che no la taca insognar…

La se insogna che la xe in Ponterosso e improvisamente con un coragio che mai la gaveva prima, la comincia a dir:

che qualchedun ne ‘iuti che semo impestai

magari anche se xe i nostri dirimpetai

la polvere e la striga che vadi nei imondezai

e che la salute e i bori sia finalmente riconquistai

Co la finissi de dir ste parole, salta fora dal Canal de Ponterosso un drago grande come la ciesa de Capodistria, el taca a spudar fogo per disinfettar come un mato tuti i cantoni e tuta l’aria, dopo cinque ore e meza de fogo qua e là, sto povereto el xe distruto, e ghe domanda ala picia dove se pol ‘ndar magnar un pochi de capuzi per tirarse su

La picia, previdente, anche in sogno la se gaveva messo in te la borseta una terrina de capuzi e la ghe la conza al drago, che magna contento come un mato, ringrazia la picia e svola via co la terina svoda soto el scajo,

La picia … la se sveja .. la xe tuta felice, ma no la sa proprio ben gnanca ela el motivo de tuta sta felicità, infatti no la se ricorda un figo seco del sogno, la va in cuzina, la impiza el telegiornal e co la senti dir che:

1. la polvere dela striga no xe più gnanca in mezo canton dela zità,
2. l’aria xe neta,
3. tuti xe sani
4. le boteghe xe tute tornade dove che le iera,

per poco no la casca per tera perché ghe vien in ‘na mente tuto el sogno !!!

E lora la taca zercar come una matta la terina dei capuzi che in sogno la ghe gaveva lasado al drago .. ve ricordè?

Ma no la la trova….

E lora la se buta dormir sperando che el drago ghe riporti indrio la terina 🙂

Alla prossima!