Pasqua 2020

Pasqua

Ghe iera una volta la Pasqua, che per chi credeva in Gesù iera la festa dela risurezion, la festa dela Vita che vinzi sula morte; ma anche per chi no credeva in Lui la festa iera bela, perché la risurezion xe sempre per tuti, e ognidun la conza nela propria vita come che ghe fa più piazer

Un anno però iera un anno bruto, perché – risurezion su risurezion zo – iera tuti seradi in casa, perché se te ‘ndavi fora te se podevi becar una bruta malatia che nissun conosseva e no se saveva un figo secco come guarir de ela, e in ospedal, anche se i saveva che no i saria stadi pagadi un klinz, comunque i tentava come danai de guarirte e de rimandarte casa.

Chi podeva – che no gaveva situazioni brutte! – passava el tempo nei seguenti modi:

• cuzinando come un mato anche se prima no saveva gnanca come che iera fato un forno,
• scrivendo sui social come un danà,
• dizendo che la malatia iera nata dale scie chimiche,
• fazendo prediche come Gesù Cristo,
• opur scrivendo semplicemente sempiade per far rider i altri

Chi “tirava i fili” ogni 15 giorni vegniva in tivù e ne dizeva :

“Se stadi bravi, ma dovè star a casa ancora 15 giorni, ocio che dopo Pasqua verzemo le librerie”

Notoriamente i italiani xe un popolo de grandi lettori, un poco come de grandi runners, ma mi no me interessava perché ogni posto de lavor che se riverzi, xe persone che torna a guadagnar, e le persone cussì forsi riva a esser un poco più felici, e quindi son felice anche mi, anche se in libreria no conosso nissun

Come finissi sta storia?

De 15 giorni in 15 giorni rivemo al 2097 e no se ricorderemo più perché volevimo andar fora de casa

Oppure:

La Germania trova un vaccino, prima la ne dizi che ne lo dà gratis, inveze dopo un poco la ne dizi

“Bravi sempi, desso che ve go dà el vaccino, vojo in cambio tuto el vostro nord Italia!

Quindi tuto el nord Italia diventa tedesco e mi che no go mai capido un klinz de quela lingua vado viver a Caltanissetta

• Per convinzer mia mama – che nel fratempo ga ragiunto 127 anni – a vegnir con mi, ghe digo che tornemo a viver nela sua casa in Istria
• Mia mama me dizi de si, ma solo se la se pol portar drio le sue straze de piati e i suoi detersivi
• Dopo gaver fato una valigia de 12 chili e mezo solo che de straze de piati, ghe digo che i confini oramai i xe serai e me ordino su e-bay un vocabolario de tedesco

Oppure:

Un altro finale … suggeriscilo tu 🙂

Alla prossima !